Граѓанските организации од Кочани за време на средбата со тимот на Мобилниот ресурсен центар на 27 ноември 2018 година покажаа голем интерес за обуки за стратешко планирање, подготовка на предлог проекти, мобилизација на волонтери, поттикнување на младите за нивно вклучување во активности, акции и вклучување во креирање на политики. Исто така, истакнаа дека имаат потреба од пристап до фондови, како и повеќе достапни информации како да дојдат до нив.
Присутните активистите рекоа дека им е потребна помош за да воспостават соработка со општините.
Претставниците на ресурсните центри на Скопје и Штип имаа средба и со градоначалникот Николчо Илијев, кој истакна дека има волја да ги поддржи проектите на граѓанските организации и активисти, но од нив очекува поголема проактивност, иницијативност и вклученост.
Целта на средбата беше да се слушнат потребите на организациите. Истовремено, тие се запознаа со работата на Граѓанскиот ресурсен центар, со акцент на центарот во Штип и поддршката што можат да ја добијат како консултации и обуки.
Вакви средби се предвидени во повеќе општини во Македонија, во рамките на Граѓанскиот ресурсен центар, проект финансиран од Европската Унија, а спроведуван од Македонскиот центар за меѓународна соработка во партнерство со Асоцијацијата за демократски иницијативи (АДИ) од Гостивар и Медиа плус од Штип.
