Околу 60 претставници на граѓанските организации учествуваа на консултациите за програмирање на IPA III инструментот за поддршка на граѓанското општество, одржани онлајн на 20 септември 2024 година.
Воведно излагање на овој настан дадоа Штефан Худолин, Раководител за соработка во Делегацијата на Европска Унија и Ирена Иванова, Програмски менаџер во Делегацијата на Европската Унија. Ирена Иванова, презентираше сеопфатен преглед на процесот на консултациите, фокусирајќи се на главните програмски цели, вкупните распределби на финансирањето во рамките на ИПА III CSF 2026-2027 и потенцијалните области на соработка.
По презентациите, граѓанските организации беа поканети да дадат свои коментари, предлози и да придонесат во програмирањето на ИПА III CSF за 2026-2027 година.
Дел од предизвиците со кои што се соочуваат граѓанските организации се поврзани со неодговорната дигитална трансформација; зголемените последици од неквалитетните содржини во медиумите, зголемената поларизација и говор на омраза во онлајн просторот, ширење на нелегална содржина и сајбер безбедност. Во однос на овие предизвици беше предложено ЕУ да даде приоритет на зајакнувањето на граѓаните со потребните знаења, алатки и платформи за да се вклучат во транспарентно владеење кое одговара на нивните потреби. Ова е клучно за поттикнување на информираното учество на граѓаните. Понатаму, ЕУ треба да придонесе за одговорна дигитална трансформација преку спроведување на регулативи и стандарди кои промовираат одговорност во дигиталните простори.
Дискусијата стави фокус и на економските теми, вклучително и динамиката на пазарот на труд, државната помош и неформалната економија, за да одговори на итни економски предизвици со кои се соочуваат граѓаните. Други приоритети што беа спомнати се поврзани со безбедноста на храната и научната соработка, дигитализација во туристичкиот сектор, посветеност на социјалните политики и задоволување на потребите на ранливите популации итн.
Претставниците на локалните организации повикаа на воведување на мерки за поедноставување на пристапот до проекти за малите организации, особено оние кои се занимаваат со локални прашања, а се со цел да се зајакне нивниот ангажман.Консултациите беа организирани во рамки на проектот „ЕУ поддршка на Граѓанскиот ресурсен центар – фаза 2“, финансиран од Европската Унија, а спроведуван од Националната фондација за развој на граѓанско општество Граѓански ресурсен центар, Македонскиот центар за меѓународна соработка (МЦМС), Медиа плус, Штип и Асоцијација за демократски иницијативи – АДИ, Гостивар.
