На обуката за „Тематско вмрежување, партнерства и коалиции“, 17 организации се запознаа со можностите за соработка во граѓанскиот сектор, градење на партнерства меѓу здруженијата, со компаниите и јавните институции, како и со различните методи, техники и алатки за комуникација, одржување на партнерски релации и коалицирање. Обуката се одржа на 27 и 28 февруари како дел од програмата за градење капацитети на Граѓанскиот ресурсен центар.
Во текот на обуката, посебно внимание се посвети на разграничување на термините мрежи, партнерства и коалиции. Покрај теоретскиот дел, учесниците имаа можност преку практични вежби да стекнат техники за мапирање потенцијални партнери, за мерење на успешноста на коалициите и партнерствата, а го проценија и сопствениот социјален капитал кој можат да го стават во функција на градење партнерства. Иако имаа различни очекувања, сите добија корисни знаења што ќе ги искористат за да ја подобрат нивната работа.
Како најкорисни делови на обуката учесниците ги издвоија практичните вежби и комплементарноста на темите. Најголем дел од нив изјавија дека дел од обуката ќе пренесат на нивните колеги од организацијата од која доаѓаат, а еден од учесниците ќе го искористи наученото за формирање социјално претпријатие и создавање мрежа на соработници.
Оваа беше последна од првиот циклус обуки кои ги организираше Граѓанскиот ресурсен центар, проект финансиран од Европската Унија а спроведуван од Македонски центар за меѓународна соработка во партнерство со Асоцијација за демократски иницијативи од Гостивар и Медиа плус од Штип.
